ലൗ ജിഹാദും മറ്റ് കെട്ട് കഥകളും: വൈറലാകുന്ന നുണകളെ ചെറുക്കാനുള്ള ലളിതമായ വസ്തുതകൾ

കേരളത്തിലെ ചില കത്തോലിക്കാ സംഘടനകൾ കേരള സ്റ്റോറി എന്ന നുണ പ്രചാരണ സിനിമ പ്രദർശിപ്പിച്ച് വിവാദം സൃഷ്ടിക്കുമ്പോൾ സംഘപരിവാർ നുണകളെ പൊളിച്ചടുക്കുന്ന ഒരു പുസ്തകത്തെ പരിചയപ്പെടുത്തുകയാണിവിടെ. ഇന്ത്യയിലെ പ്രമുഖരായ മൂന്ന് മാധ്യമ പ്രവർത്തകർ ചേർന്നെഴുതിയ ലൗവ് ജിഹാദ് ആൻ്റ് അദർ ഫിക്ഷൻസ് എന്ന പുസ്തകം ഈ കാലത്ത് എത്രത്തോളം അനിവാര്യമായ രചനയാണെന്ന് ഈ ലേഖനത്തിൽ കെ സഹദേവൻ വിശദീകരിക്കുന്നു.

”ഇന്ത്യയിലെ ഹിന്ദു ഭൂരിപക്ഷം ന്യൂനപക്ഷങ്ങളില്‍ നിന്ന് ഭീഷണി നേരിടുന്നു”. സമൂഹ മനസ്സിന്റെ ആഴങ്ങളിലേക്ക് ആഴ്ന്നിറങ്ങി, വര്‍ത്തമാന കാലത്തെ സാമാന്യബോധമായി ഏതാണ്ട് മാറിക്കഴിഞ്ഞിരിക്കുന്ന ഈ വ്യാജപ്രചരണങ്ങള്‍ എവിടെ നിന്ന് കടന്നുവരുന്നു. ‘ലൗ ജിഹാദ്’,

‘പോപ്പുലേഷന്‍ ജിഹാദ്’ തുടങ്ങി വിവിധങ്ങളായ ഗൂഢാലോചനാ സിദ്ധാന്തങ്ങളില്‍ നിന്നുരുവെടുത്ത കഥകള്‍ സോഷ്യല്‍ മീഡിയയുടെ ചിറകിലേറി നമ്മുടെ ദൈനംദിന ജീവിതത്തിലേക്ക് കടന്നുവരികയാണ്. നൂറുകണക്കായ വെബ്‌സൈറ്റുകള്‍, പതിനായിരക്കണക്കിന് വാട്‌സാപ്പ് ഗ്രൂപ്പുകള്‍, ലക്ഷക്കണക്കായ ട്വീറ്റുകള്‍, ദശലക്ഷക്കണക്കിന് കാഴ്ചക്കാരുള്ള ഇന്‍സ്റ്റാഗ്രാം വീഡിയോകള്‍, റീലുകള്‍ എന്നിവകളിലൂടെ അവ നമ്മുടെ പൊതു ഇടങ്ങളെ കീഴടക്കിക്കൊണ്ടിരിക്കുന്നു.

ഈ ഗൂഢാലോചന സിദ്ധാന്തങ്ങള്‍ പലപ്പോഴും നമ്മുടെ സൗഹൃദ വലയത്തിലൂടെ- ഒരുവേളനമ്മുടെ ശുദ്ധനായ അയല്‍ക്കാരന്‍, അല്ലെങ്കില്‍ സഹപ്രവര്‍ത്തകന്‍, അകന്ന ഒരു ബന്ധു, പൂര്‍വ്വ വിദ്യാര്‍ത്ഥി സൗഹൃദ കൂട്ടായ്മ- അത് നമ്മിലേക്ക് കടന്നെത്തുന്നു. അടുപ്പം സൃഷ്ടിക്കുന്ന ആധികാരികതകളിലൂടെ അവ ജനസഞ്ചയങ്ങളുടെ ബോധത്തെ പതുക്കെ കീഴടക്കുന്നു.

‘ഹിന്ദു അപകടത്തില്‍’ എന്ന സംഘപരിവാര്‍ വായ്ത്താരികളെ പൊതുമണ്ഡലത്തിലേക്ക് പ്രസരിപ്പിക്കുന്നതിനായി ആസൂത്രിതമായി നടക്കുന്ന ഈ പ്രചണ്ഡ പ്രചരണങ്ങളുടെ സത്യാവസ്ഥകള്‍ എന്തെന്ന് കണ്ടെത്താന്‍ പലപ്പോഴും നമുക്ക് സാധിക്കാറില്ല. ഉടമസ്ഥാവകാശം ഏറ്റെടുക്കാന്‍ ആരുമില്ലാത്ത, എന്നാല്‍ ഏറ്റെടുത്ത് പ്രചരിപ്പിക്കാന്‍ വലിയതോതില്‍ ആളുകളുള്ള ഈ വാര്‍ത്തകള്‍ അവഗണിക്കാന്‍ പോലും സാധിക്കാത്ത വിധത്തില്‍ അവ സമൂഹത്തില്‍ നിരന്തരം പ്രവര്‍ത്തിച്ചു കൊണ്ടേയിരിക്കുന്നു.

ഹിന്ദു രാഷ്ട്ര നിര്‍മ്മിതിക്കായുള്ള പൊതുസമ്മതി നേടിയെടുക്കുന്നതിനായി സംഘപരിവാര്‍ ആസൂത്രണം ചെയ്തു നടപ്പിലാക്കിക്കൊണ്ടിരിക്കുന്ന ഈ ഗൂഢാലോചനാ സിദ്ധാന്തത്തെ വളരെ ആഴത്തില്‍ പരിശോധിക്കുകയും വിലയിരുത്തുകയും ചെയ്യുന്ന പുസ്തകമാണ് ‘ലൗ ജിഹാദ് ആന്റ് അദര്‍ ഫിക്ഷന്‍സ്: സിംപ്ള്‍ ഫാക്ട്‌സ് ടു കൗണ്ടര്‍ വൈറല്‍ ഫാള്‍സ്ഹുഡ്‌സ്’.

പത്രപ്രവര്‍ത്തകര്‍ എന്ന നിലയില്‍ പേരെടുത്ത മൂന്ന് വ്യക്തികളാണ്. ശ്രമകരമായ ഈ ദൗത്യത്തിന് പിന്നില്‍ ശ്രീനിവാസന്‍ ജെയ്ന്‍, മറിയം അലാവി, സുപ്രിയ ശര്‍മ്മ എന്നിവര്‍ എഴുതി, അലേഫ് ബുക് കമ്പനി 2024 ജനുവരി 15ന് പുറത്തിറക്കിയ ഈ പുസ്തകത്തിന്റെ മൂന്ന് ലക്ഷത്തോളം കോപ്പികള്‍ കഴിഞ്ഞ രണ്ടാഴ്ച കൊണ്ട് വിറ്റുപോയി എന്നറിയുന്നതും നുണകളുടെ മലവെള്ളപ്പാച്ചിലില്‍ സത്യത്തെ അന്വേഷിക്കുന്ന വലിയൊരു കൂട്ടം ജനങ്ങള്‍ ഇവിടുണ്ടെന്നതിന്റെ കൂടി തെളിവാണ്.

208 പേജുകള്‍ വരുന്ന ഈ പുസ്തകത്തില്‍ സംഘപരിവാരങ്ങള്‍ നമ്മുടെ പൊതുബോധത്തിലേക്ക് തള്ളിവിടുന്ന വ്യാജ വ്യാര്‍ത്തകളുടെ പൊതുരീതികളെ വസ്തുതകളുടെ അകമ്പടിയോടു കൂടി തുറന്നുകാട്ടുന്നുണ്ട്.

ആമുഖ ലേഖനത്തില്‍ ലേഖകര്‍ ഇപ്രകാരം എഴുതുന്നു: ”പത്രപ്രവര്‍ത്തകര്‍ എന്ന നിലയില്‍, അധികാരത്തിന്റെ പരമ്പരാഗത മാട്രിക്‌സില്‍ നിന്നുകൊണ്ട് രാഷ്ട്രീയക്കാരും സര്‍ക്കാരുകളും കോര്‍പ്പറേഷനുകളും നടത്തുന്ന അവകാശവാദങ്ങള്‍ പരിശോധിക്കുന്നതിനാണ് ഞങ്ങളുടെ പ്രൊഫഷണല്‍ ജീവിതത്തിന്റെ ഒരു പ്രധാന ഭാഗം ഞങ്ങള്‍ ചെലവഴിച്ചത്. എന്നിരുന്നാലും, ഈ പുസ്തകത്തില്‍, ഓരോ ദിവസവും ദശലക്ഷക്കണക്കിന് ഇന്ത്യക്കാരുടെ വാട്ട്സ്ആപ്പ് ചാറ്റുകളിലും സോഷ്യല്‍ മീഡിയ ഫീഡുകളിലും എവിടെ നിന്നെന്നറിയാതെ വന്നെത്തുന്ന ഒരു കൂട്ടം വൈറല്‍ വിവരങ്ങളിലേക്ക് ശ്രദ്ധ തിരിക്കാന്‍ ഞങ്ങള്‍ തീരുമാനിച്ചു. ഷാരൂഖ് ഖാനെ ‘പോപ്പുലേഷന്‍ ജിഹാദി’ എന്നും ആമിര്‍ ഖാനെ ‘ലവ് ജിഹാദി’ എന്നും, അവര്‍ മുസ്ലീമായതിനാല്‍ മാത്രം, ആരോപിക്കാന്‍ കഴിയുന്ന വിചിത്രമായ ഒരു പുതു സാധാരണാവസ്ഥയെ അവയുടെ വ്യാപനം സൂചിപ്പിക്കുന്നു”.

വസ്തുതകളുടെ പിന്‍ബലമില്ലാത്ത, ഉറവിടമോ, ഉടമസ്ഥരോ ഇല്ലാത്ത, ഇത്തരം വാര്‍ത്തകള്‍ക്ക് പിന്നില്‍ നാം ഇതുവരെ കാണാത്ത സാമൂഹിക രാഷ്ട്രീയ കാരണങ്ങള്‍ എന്തെങ്കിലും നിലനില്‍ക്കുന്നുണ്ടോ എന്ന് പരിശോധിക്കാനാണ് ഈ പുസ്തകത്തിലൂടെ ലേഖകര്‍ ശ്രമിക്കുന്നത്. പത്ര പ്രവര്‍ത്തന മേഖലയിലെ ദീര്‍ഘകാല പ്രവര്‍ത്തന പരിചയം ഈയൊരു ശ്രമത്തില്‍ അവരെ സഹായിക്കുന്നുണ്ടെന്ന് കാണാം.

വിവരാവകാശ അപേക്ഷകള്‍ ഫയല്‍ ചെയ്തും, സര്‍ക്കാര്‍ രേഖകള്‍ പരിശോധിച്ചും, പാര്‍ലമെന്ററി ചോദ്യങ്ങളിലൂടെ കടന്നുചെന്നും, സംഘപരിവാര്‍ നേതാക്കളുമായി അഭിമുഖങ്ങള്‍ നടത്തിയും, അക്കാദമിക് പഠനങ്ങള്‍ വായിച്ചും, ഗ്രൗണ്ട് റിപ്പോര്‍ട്ടിംങ്ങുകളിലൂടെ സഞ്ചരിച്ചും ആണ് ഈ പുസ്തകം തയ്യാറാക്കിയിരിക്കുന്നത്.

വ്യാജ വാര്‍ത്താ നിര്‍മ്മിതിക്ക് വസ്തുതകളുടെയോ തെളിവുകളുടെയോ പിന്‍ബലം ആവശ്യമില്ല എന്നത് അവയെക്കുറിച്ചുള്ള അന്വേഷണം നിറയെ ”കണ്ണാടികളുള്ള ഹാളില്‍ പ്രവേശിക്കുന്നത് പോലെയുള്ള” അനുഭവമാണ് സമ്മാനിക്കുകയെന്ന് ലേഖകര്‍ അഭിപ്രായപ്പെടുന്നു. അവ്യക്തമായി നിര്‍വ്വചിക്കപ്പെട്ട ഒരു പദപ്രയോഗത്തിന്മേല്‍ നിന്നുകൊണ്ട് എന്തിനെയും തങ്ങളുടെ ഇഷ്ടത്തിനൊത്ത് വ്യാഖ്യാനിക്കാന്‍ സാധിക്കുന്ന തരത്തിലാണ് വ്യാജ വാര്‍ത്തകള്‍ സൃഷ്ടിക്കപ്പെടുന്നത്.

‘ലവ് ജിഹാദ്’ എന്ന ലേബല്‍ നിരവധി കേസുകളില്‍ നിരന്തരം പ്രയോഗിക്കാന്‍ കഴിയുന്ന അവ്യക്ത നിര്‍വ്വചനത്തോടു കൂടിയ ഒന്നാണെന്ന് പുസ്തകത്തിലൂടെ ലേഖകര്‍ വിശദീകരിക്കുന്നു. വസ്തുതാ പരിശോധന അസാധ്യമാക്കും വിധം ഒന്നില്‍ നിന്ന് മറ്റൊന്നിലേക്ക് വ്യാജവാര്‍ത്തകള്‍ പ്രചരിച്ചുകൊണ്ടേയിരിക്കുന്നു. ഒരു പുതിയ സിദ്ധാന്തം അല്ലെങ്കില്‍ പഴയ സിദ്ധാന്തത്തിന്റെ ഒരു ഉപ-പ്ലോട്ട് ദിനേനയെന്നോണം ഉറവെടുക്കുന്നു.

പുസ്തകത്തിന്റെ ആദ്യ അധ്യായം ‘ലവ് ജിഹാദി’നെക്കുറിച്ചാണ്. സംഘപരിവാര്‍ ഉയര്‍ത്തിവിട്ട വ്യാജവാര്‍ത്തകളില്‍, ഗൂഢ സിദ്ധാന്തങ്ങളില്‍, ഏറ്റവും പ്രബലിതമായ ഒന്ന്. പിന്നീട് മൂന്ന് അധ്യായങ്ങളിലായി ‘പോപ്പുലേഷന്‍ ജിഹാദ്’, ‘നിര്‍ബന്ധിത മതപരിവര്‍ത്തനം’, ‘മുസ്ലീം പ്രീണനം’ തുടങ്ങിയ വിഷയങ്ങളെ ആഴത്തില്‍ വിശകലനം ചെയ്യുകയും നിരവധി വ്യാജവാര്‍ത്തകളെ ഉദാഹരിച്ചുകൊണ്ട് അവയ്ക്ക് പിന്നിലെ വസ്തുതകളെ വെളിച്ചത്തുകൊണ്ടുവരുവാന്‍ ലേഖകര്‍ ശ്രമിക്കുകയും ചെയ്യുന്നുണ്ട്.

ഗൂഢാലോചനാ സിദ്ധാന്തങ്ങളും വ്യാജവാര്‍ത്താ നിര്‍മ്മിതികളും ഒട്ടും പുതിയതല്ലെന്ന് നമുക്കറിയാം. പക്ഷേ, മുന്‍കാലങ്ങളില്‍ നിന്ന് ഭിന്നമായി അധികാരത്തിന്റെയും വന്‍കിട മൂലധനത്തിന്റെയും പിന്‍ബലത്തോടെയാണ് വര്‍ത്തമാന കാലത്ത് അവ കടന്നുവരുന്നത് എന്നത് അവയുടെ ഗൗരവം വര്‍ധിപ്പിക്കുന്നുണ്ട്. സമൂഹത്തെ വര്‍ഗ്ഗീയമായി വിഭജിക്കാനുള്ള ആസൂത്രിത ശ്രമം അതിന്റെ മൂര്‍ധന്യത്തിലെത്തി നില്‍ക്കുന്ന സമയത്താണ് ഈ പുസ്തകം പുറത്തിറങ്ങുന്നത് എന്നത് വളരെ ആശാവഹമായ കാര്യമാണ്. ലേഖകരുടെ ശ്രമത്തെ എത്ര അഭിനന്ദിച്ചാലും മതിയാകില്ല.

“Love Jihad and Other Fictions: Simple Facts to Counter Viral Falsehood” by Sreenivasan Jain, Mariyam Alavi, Supriya Sharma.

Published by: Aleph Book Company, 15 January 2024 (208 Pages)