ഒരു ഹിന്ദുത്വ ഗുരുകുലവും പ്രത്യശാസ്ത്ര പ്രസ്ഥാനവും എന്ന നിലയിൽ രാഷ്ട്രീയ സ്വയംസേവക് സംഘിൻ്റെ (ആർ.എസ്.എസ്) സവിശേഷമായ ഒരു പ്രവർത്തന സിദ്ധി സ്വന്തം കേഡർമാരെ നുണകൾ പ്രചരിപ്പിക്കുന്നതിലും ചരിത്രത്തെ വളച്ചൊടിക്കുന്നതിലും പ്രത്യേകം പരിശീലിപ്പിക്കുക എന്നതാണ്. ഈ അടിസ്ഥാന പ്രചാരണതന്ത്രത്തിന്റെ ഏറ്റവും പുതിയ തെളിവ് നമ്മൾ കാണുന്നത് അടിയന്തരാവസ്ഥയുടെ 50-ാം വാർഷികത്തിലാണ് [1975-77 മുതൽ 2025 വരെ].
ആർ.എസ്.എസിലെ ഓരോ പ്രവർത്തകനും ഇന്ത്യക്കാരെ ഓർമ്മിപ്പിക്കുന്നത്, അടിയന്തരാവസ്ഥയ്ക്കെതിരെ ആർ.എസ്.എസ് എങ്ങനെ നിലകൊണ്ടു എന്നും, ‘ഇന്ദിരാഗാന്ധിയുടെ സ്വേച്ഛാധിപത്യ ഭരണത്തെ അതിന്റെ കേഡർമാർ എത്ര ധീരമായി വെല്ലുവിളിച്ചു എന്നും, അടിയന്തരാവസ്ഥാ വിരുദ്ധ പ്രസ്ഥാനത്തിൽ വലിയ ത്യാഗങ്ങൾ ചെയ്തു‘ എന്നുമാണ്. ആർ.എസ്.എസ് മുഖപത്രമായ ‘ഓർഗനൈസറി‘ന്റെ (ഇംഗ്ലീഷ്) ഏറ്റവും പുതിയ ലക്കത്തിൽ (ജൂൺ 24, 2025), പ്രധാനമന്ത്രി മോദിയെ അടിയന്തരാവസ്ഥയ്ക്കെതിരായ പോരാട്ടത്തിന്റെ ഏക പ്രതീകമായി ഉയർത്തിക്കാട്ടിക്കൊണ്ട് ഇങ്ങനെ കുറിക്കുന്നു:
“ആ പാഠം പൊതുസമൂഹത്തിന്റെ ഓർമ്മകളിൽ ആഴത്തിൽ പതിഞ്ഞിരുന്നു. അടിയന്തരാവസ്ഥ ചരിത്രത്തിലെ വെറുമൊരു അധ്യായം എന്നതിനപ്പുറം ഒരു താക്കീതായി മാറി. നരേന്ദ്ര മോദിയെ സംബന്ധിച്ചിടത്തോളം അതൊരു ഭൂതകാല സംഭവമായിരുന്നില്ല; അത് അദ്ദേഹത്തിന്റെ വ്യക്തിപരമായ ജീവിതയാത്രയുടെ ഭാഗമായിരുന്നു. പ്രധാനമന്ത്രിയെന്ന നിലയിൽ, ആ ഇരുണ്ട കാലഘട്ടത്തെക്കുറിച്ച് അദ്ദേഹം പലപ്പോഴും രാജ്യത്തെ ഓർമ്മിപ്പിച്ചിട്ടുണ്ട്… സ്വതന്ത്രമായ ചിന്തകളെയും കലയെയും ആവിഷ്കാരങ്ങളെയും തടവിലാക്കുന്നതിനെക്കുറിച്ചായിരുന്നു ആ കാലം. ആ കാലഘട്ടം അവശേഷിപ്പിച്ചത് വെറും മുറിവുകളായിരുന്നില്ല, മറിച്ച് ഓർമ്മപ്പെടുത്തലുകളായിരുന്നു. സ്വാതന്ത്ര്യം ദാനം ചെയ്യപ്പെടുന്ന ഒന്നല്ല, നേടേണ്ടതാണെന്ന് അത് നമ്മെ പഠിപ്പിച്ചു.” [i]
ആർ.എസ്.എസ്-ബി.ജെ.പി ഭരണാധികാരികൾ ലിബറൽ ജനാധിപത്യ മൂല്യങ്ങളോട് പ്രതിബദ്ധതയുള്ളവരായിരുന്നു എന്ന വാദം നമുക്ക് ആദ്യം പരിശോധിക്കാം. ആർ.എസ്.എസിന്റെ ഏറ്റവും പ്രമുഖ സൈദ്ധാന്തികനും ‘വെറുപ്പിന്റെ ഗുരു‘ എന്നറിയപ്പെടുന്നയാളുമായ എം.എസ്. ഗോൾവാൾക്കർ [പ്രധാനമന്ത്രി മോദി അദ്ദേഹത്തെ ഒരു രാഷ്ട്രീയ നേതാവായി വളർത്തിയതിന്റെ ക്രെഡിറ്റ് നൽകുന്ന വ്യക്തി] 1940-ൽ ആർ.എസ്.എസിന്റെ 1350 ഉന്നതതല കേഡർമാരെ അഭിസംബോധന ചെയ്തുകൊണ്ട് പ്രഖ്യാപിച്ചു: “ഒരു പതാക, ഒരു നേതാവ്, ഒരു പ്രത്യയശാസ്ത്രം എന്നിവയിൽ നിന്ന് പ്രചോദനം ഉൾക്കൊണ്ട് ആർ.എസ്.എസ് ഈ മഹത്തായ ഭൂമിയുടെ ഓരോ കോണിലും ഹിന്ദുത്വത്തിന്റെ ജ്വാല ജ്വലിപ്പിക്കുകയാണ്.”
സമഗ്രാധിപത്യത്തോടുള്ള അത്തരം ദാർശനികമായ അഭിനിവേശം കാരണം, ആർ.എസ്.എസ് എല്ലായ്പ്പോഴും അധികാര പങ്കാളിത്തത്തെ വെറുത്തു. ഇന്ത്യൻ ഭരണകൂടത്തിന്റെ ഒരു ‘അടിസ്ഥാന‘ സവിശേഷതയായ ഭരണഘടനയുടെ ഫെഡറൽ ഘടനയെ സംഘത്തിന്റെ വക്താക്കൾ ശക്തമായി എതിർത്തു. 1961-ൽ ഗോൾവാൾക്കർ പ്രഖ്യാപിച്ചു: “ഇന്നത്തെ ഫെഡറൽ രൂപത്തിലുള്ള സർക്കാർ വിഘടനവാദ വികാരങ്ങളെ സൃഷ്ടിക്കുക മാത്രമല്ല, അതിനെ പരിപോഷിപ്പിക്കുകയും ചെയ്യുന്നു… ഇതിനെ പൂർണ്ണമായും പിഴുതെറിയുകയും ഭരണഘടനയെ ശുദ്ധീകരിച്ച് ഏകീകൃത ഭരണകൂടം സ്ഥാപിക്കുകയും വേണം.” [iii]
ഔദ്യോഗികമായി പ്രഖ്യാപിക്കപ്പെട്ട അടിയന്തരാവസ്ഥയെ സംബന്ധിച്ചിടത്തോളം, ആർ.എസ്.എസ് അതിനെതിരെ പോരാടി എന്ന വാദം സമകാലിക വിവരണങ്ങളുടെയും ആർ.എസ്.എസ് രേഖകളിലെ തെളിവുകളുടെയും വെളിച്ചത്തിൽ വിലയിരുത്തേണ്ടതുണ്ട്. ഈ വിഷയത്തിൽ, ഇന്ത്യയിലെ മുതിർന്ന ചിന്തകനും പത്രപ്രവർത്തകനുമായ പ്രഭാഷ് ജോഷിയുടെയും, അടിയന്തരാവസ്ഥാ കാലത്ത് ഇന്റലിജൻസ് ബ്യൂറോ [ഐ.ബി.] ഡെപ്യൂട്ടി മേധാവിയായിരുന്ന ടി.വി. രാജേശ്വറിന്റെയും രണ്ട് വിവരണങ്ങൾ അതീവ പ്രാധാന്യമുള്ളവയാണ്. അടിയന്തരാവസ്ഥയുടെ (അല്ലെങ്കിൽ ഭരണകൂട ഭീകരതയുടെ) നാളുകളെ അവർ ഓർത്തെടുക്കുന്നു. ആ കാലത്ത് ആർ.എസ്.എസ് ‘ഇന്ദിരാഗാന്ധിയുടെ അടിച്ചമർത്തൽ ഭരണത്തിന് കീഴടങ്ങി‘, ‘അവൾക്കും മകൻ സഞ്ജയ് ഗാന്ധിക്കും അടിയന്തരാവസ്ഥാ ഭരണകൂടം പ്രഖ്യാപിച്ച ക്രൂരമായ 20-ഇന പരിപാടി വിശ്വസ്തതയോടെ നടപ്പിലാക്കാമെന്ന് ഉറപ്പുനൽകി‘. വാസ്തവത്തിൽ, ധാരാളം ആർ.എസ്.എസ് കേഡർമാർ മാപ്പപേക്ഷകൾ (മാഫിനാമ) നൽകി ജയിലുകളിൽ നിന്ന് മോചിതരായി.
അടിയന്തരാവസ്ഥയുടെ 25-ാം വാർഷികത്തിൽ ഇംഗ്ലീഷ് വാരികയായ ‘തെഹൽക്ക‘യിൽ മുതിർന്ന പത്രപ്രവർത്തകനായ പ്രഭാഷ് ജോഷിയുടെ ലേഖനം പ്രസിദ്ധീകരിച്ചിരുന്നു. [iv] അദ്ദേഹത്തിന്റെ അഭിപ്രായത്തിൽ, അടിയന്തരാവസ്ഥാ കാലത്ത് പോലും, അടിയന്തരാവസ്ഥാ വിരുദ്ധ പോരാട്ടത്തിൽ ആർ.എസ്.എസിന്റെ പങ്കാളിത്തത്തെക്കുറിച്ച് “എല്ലായ്പ്പോഴും ഒരുതരം സംശയവും ശ്രദ്ധാപൂർവ്വമായ വിശ്വാസമില്ലായ്മയും നിലനിന്നിരുന്നു.” അദ്ദേഹം തുടർന്നു:
“അന്നത്തെ ആർ.എസ്.എസ് മേധാവി ബാലാസാഹെബ് ദേവറസ്, സഞ്ജയ് ഗാന്ധിയുടെ കുപ്രസിദ്ധമായ 20-ഇന പരിപാടി നടപ്പിലാക്കാൻ സഹായിക്കാമെന്ന് പ്രതിജ്ഞയെടുത്ത് ഇന്ദിരാഗാന്ധിക്ക് ഒരു കത്ത് എഴുതി. ഇതാണ് ആർ.എസ്.എസിന്റെ യഥാർത്ഥ സ്വഭാവം… നിങ്ങൾക്ക് അവരുടെ പ്രവർത്തനരീതി, ഒരു മാതൃക മനസ്സിലാക്കാൻ സാധിക്കും. അടിയന്തരാവസ്ഥയിൽ പോലും, ജയിലുകളിൽ നിന്ന് പുറത്തുവന്ന ആർ.എസ്.എസിലെയും ജനസംഘത്തിലെയും പലരും മാഫിനാമകൾ (മാപ്പപേക്ഷകൾ) നൽകി. ആദ്യം ക്ഷമാപണം നടത്തിയ കൂട്ടത്തിൽ. അവരുടെ പ്രമുഖ നേതാക്കൾ പലരും ഉണ്ടായിരുന്നു . ഒരു കണക്കെടുക്കുകയാണെങ്കിൽ വളരെ കുറച്ച് നേതാക്കൾ മാത്രമാണ് അവരുടെ പക്ഷത്തുനിന്ന് ജയിലിൽ ജയിലിൽ കഴിഞ്ഞത്: അടൽ ബിഹാരി വാജ്പേയി [മിക്കപ്പോഴും ആശുപത്രിയിൽ], എൽ.കെ. അദ്വാനിയും യുവാവായ അരുൺ ജെയ്റ്റ്ലി എന്നിവരൊക്കെയാണ് സംഘപരിവാർ പക്ഷത്തുനിന്ന് ജയിലിലായിരുന്നത് . പക്ഷേ ആർ.എസ്.എസ് അടിയന്തരാവസ്ഥയെ എതിർത്ത് പോരാടിയില്ല. അപ്പോൾ പിന്നെ എന്തിനാണ് ബി.ജെ.പി അടിയന്തരാവസ്ഥ വിരുദ്ധ പോരാട്ടത്തിന്റെ ഓർമ്മയെ തങ്ങളുടേതാക്കാൻ ശ്രമിക്കുന്നത്?”
പ്രഭാഷ് ജോഷി എത്തിച്ചേർന്ന നിരീക്ഷണം ഇതായിരുന്നു: “അവർ ഒരു പോരാട്ട ശക്തിയല്ല, ഒരിക്കലും പോരാടാൻ താല്പര്യമുള്ളവരുമല്ല. അവർ അടിസ്ഥാനപരമായി ഒത്തുതീർപ്പുകൾക്ക് തയ്യാറാകുന്നവരാണ്. സർക്കാരിനെതിരെ അവർ ഒരിക്കലും ആത്മാർത്ഥമായി എതിർപ്പ് പ്രകടിപ്പിക്കാറില്ല.”
ഉത്തർപ്രദേശ്, സിക്കിം എന്നിവിടങ്ങളിൽ ഗവർണറായി സേവനമനുഷ്ഠിച്ച ടി.വി. രാജേശ്വർ ‘ഇന്ത്യ: ദി ക്രൂഷ്യൽ ഇയേഴ്സ്‘ [ഹാർപ്പർ കോളിൻസ്] എന്ന പുസ്തകം എഴുതിയിട്ടുണ്ട് . അതിൽ അദ്ദേഹം ഇങ്ങനെ പറയുന്നു . “അവർ (ആർ.എസ്.എസ്) അടിയന്തരാവസ്ഥയെ പിന്തുണച്ചുവെന്ന് മാത്രമല്ല, ശ്രീമതി ഗാന്ധിയെ കൂടാതെ സഞ്ജയ് ഗാന്ധിയുമായും ബന്ധം സ്ഥാപിക്കാൻ ആഗ്രഹിച്ചു” . [v] കരൺ ഥാപ്പറുമായുള്ള ഒരു അഭിമുഖത്തിൽ രാജേശ്വർ ഈ വസ്തുത സ്ഥിരീകരിക്കുകയും ചെയ്തു , :
“ ദേവറസ് ആകട്ടെപ്രധാനമന്ത്രിയുടെ വസതിയുമായി നിശ്ശബ്ദമായി ഒരു ബന്ധം സ്ഥാപിക്കുകയും രാജ്യത്ത് ക്രമസമാധാനവും അച്ചടക്കവും നടപ്പിലാക്കാൻ സ്വീകരിച്ച നിരവധി നടപടികൾക്ക് ശക്തമായ പിന്തുണ പ്രകടിപ്പിക്കുകയും ചെയ്തു. ദേവറസിന് ശ്രീമതി ഗാന്ധിയെയും സഞ്ജയെയും കാണാൻ അതിയായ താല്പര്യമുണ്ടായിരുന്നു. പക്ഷേ ശ്രീമതി ഗാന്ധി വിസമ്മതിച്ചു.” [vi]
രാജേശ്വറിന്റെ പുസ്തകം ഇതു കൂടി പറയുന്നു , “ കുടുംബാസൂത്രണം നടപ്പിലാക്കാൻ ( പ്രത്യേകിച്ചും മുസ്ലീങ്ങൾക്കിടയിൽ) സഞ്ജയ് ഗാന്ധി നടത്തിയ സംഘടിത ശ്രമം, ദേവറസ്സിന്റെ അംഗീകാരം പിടിച്ചുപറ്റിയിരുന്നു.” [vii] അടിയന്തരാവസ്ഥയ്ക്ക് ശേഷവും “സംഘടന (ആർ.എസ്.എസ്) അടിയന്തരാവസ്ഥാനന്തര തിരഞ്ഞെടുപ്പുകളിൽ കോൺഗ്രസിനുള്ള തങ്ങളുടെ പിന്തുണ പ്രത്യേകമായി അറിയിച്ചിരുന്നു” എന്ന വസ്തുതയും രാജേശ്വർ പങ്കുവെച്ചു. [viii] അടിയന്തരാവസ്ഥാ കാലഘട്ടത്തിൽ ആർ.എസ്.എസിന്റെ മിക്ക മുതിർന്ന നേതാക്കളും അടിയന്തരാവസ്ഥയ്ക്കെതിരായ പോരാട്ടത്തെ ഒറ്റിക്കൊടുത്തിരുന്നു എന്ന് സുബ്രഹ്മണ്യൻ സ്വാമി പോലും അഭിപ്രായപ്പെട്ടത് ശ്രദ്ധേയമാണ്. [ix]
ആർ.എസ്.എസിന്റെ ആർക്കൈവുകളിലെ സമകാലിക രേഖകൾ പ്രഭാഷ് ജോഷിയുടെയും രാജേശ്വറിന്റെയും വിവരണങ്ങളെ ശരിവെക്കുന്നു. അടിയന്തരാവസ്ഥ പ്രഖ്യാപിച്ച് രണ്ട് മാസത്തിനുള്ളിൽ ആർ.എസ്.എസിന്റെ മൂന്നാമത്തെ മേധാവി മധുകർ ദത്താത്രയ ദേവറസ് ഇന്ദിരാഗാന്ധിക്ക് ആദ്യത്തെ പിന്തുണാ കത്ത് എഴുതി. ആയിരക്കണക്കിന് ഇന്ത്യക്കാരുടെ മനുഷ്യാവകാശങ്ങൾ തകർത്ത് ഭരണകൂട ഭീകരത അഴിഞ്ഞാടിയിരുന്ന സമയമായിരുന്നു അത്.
1975 ഓഗസ്റ്റ് 22-ന് എഴുതിയ കത്തിൽ, ദേവറസ് ഇന്ദിരയെ പ്രശംസിച്ചുകൊണ്ട് ഇങ്ങനെ എഴുതി:
“1975 ഓഗസ്റ്റ് 15-ന് ചെങ്കോട്ടയിൽ നിന്ന് നിങ്ങൾ രാഷ്ട്രത്തെ അഭിസംബോധന ചെയ്ത പ്രസംഗം ഞാൻ യെർവാദ ജയിലിലിരുന്ന് ശ്രദ്ധയോടെ കേട്ടു. നിങ്ങളുടെ പ്രസംഗം സമയബന്ധിതവും സന്തുലിതവുമായിരുന്നു, അതിനാൽ ഞാൻ നിങ്ങൾക്ക് കത്തെഴുതാൻ തീരുമാനിച്ചു.” [x]
ഇന്ദിരാഗാന്ധി ഇതിന് മറുപടി നൽകിയില്ല. അപ്പോൾ ദേവറസ് 1975 നവംബർ 10-ന് ഇന്ദിരയ്ക്ക് മറ്റൊരു കത്ത് എഴുതി. അലഹബാദ് ഹൈക്കോടതി വിധിച്ച അയോഗ്യതയിൽ നിന്ന് സുപ്രീം കോടതി അവരെ കുറ്റവിമുക്തയാക്കിയതിന് അഭിനന്ദിച്ചുകൊണ്ടാണ് അദ്ദേഹം കത്ത് ആരംഭിച്ചത്:
“സുപ്രീം കോടതിയിലെ അഞ്ച് ജഡ്ജിമാരും നിങ്ങളുടെ തിരഞ്ഞെടുപ്പ് ഭരണഘടനാപരമാണെന്ന് പ്രഖ്യാപിച്ചു, അതിന് ഹൃദയംഗമമായ ആശംസകൾ.” ഈ വിധി നീതിന്യായ വ്യവസ്ഥിതിക്കുമേലുള്ള എക്സിക്യൂട്ടീവ് സമ്മർദ്ദത്തിന്റെ പ്രതിഫലനമാണെന്ന് പ്രതിപക്ഷം ഉറച്ചു വിശ്വസിച്ചിരുന്നു എന്നത് ശ്രദ്ധിക്കേണ്ടതാണ്. ദേവറസ് കൂട്ടിച്ചേർത്തു: “ജയ്പ്രകാശ് നാരായണന്റെ പ്രസ്ഥാനത്തിന്റെ പശ്ചാത്തലത്തിലാണ് ആർ.എസ്.എസിന്റെ പേര് പരാമർശിക്കപ്പെടുന്നത്. സർക്കാർ യാതൊരു കാരണവുമില്ലാതെ ആർ.എസ്.എസിനെ ഗുജറാത്ത് പ്രസ്ഥാനവുമായും ബിഹാർ പ്രസ്ഥാനവുമായും ബന്ധിപ്പിച്ചിരിക്കുന്നു… സംഘത്തിന് ഈ പ്രസ്ഥാനങ്ങളുമായി ഒരു ബന്ധവുമില്ല…” [xi]
ഇന്ദിരാഗാന്ധി ഈ കത്തിനും മറുപടി നൽകാത്തതുകൊണ്ട്, അടിയന്തരാവസ്ഥയെ മതപരമായി പിന്തുണച്ചതും ഇന്ദിരാഗാന്ധിയുടെ പ്രിയപ്പെട്ടയാളുമായിരുന്ന വിനോബ ഭാവെയെ ആർ.എസ്.എസ് മേധാവി സമീപിച്ചു. 1976 ജനുവരി 12-ന് എഴുതിയ ഒരു കത്തിൽ, ആർ.എസ്.എസിന്റെ നിരോധനം നീക്കാൻ ആചാര്യ വഴി നിർദ്ദേശിക്കണമെന്ന് അദ്ദേഹം അപേക്ഷിച്ചു. [xii] ആചാര്യയും ദിയോറസിന്റെ കത്തിന് മറുപടി നൽകാത്തതിനാൽ, പിന്നീട് തീയതിയില്ലാത്ത മറ്റൊരു കത്തിൽ നിരാശയോടെ അദ്ദേഹം ഇങ്ങനെ കുറിച്ചു:
“പത്ര റിപ്പോർട്ടുകൾ പ്രകാരം ബഹുമാനപ്പെട്ട പ്രധാനമന്ത്രി [ഇന്ദിരാഗാന്ധി] ജനുവരി 24-ന് പാവ്നാർ ആശ്രമത്തിൽ നിങ്ങളെ ( വിനോബ ഭാവേയെ) കാണാൻ പോകുന്നു. അപ്പോൾ രാജ്യത്തിന്റെ ഇപ്പോഴത്തെ അവസ്ഥയെക്കുറിച്ച് ചർച്ചയുണ്ടാകും. ആർ.എസ്.എസിനെക്കുറിച്ചുള്ള പ്രധാനമന്ത്രിയുടെ തെറ്റിദ്ധാരണകൾ മാറ്റാൻ ശ്രമിക്കണമെന്ന് ഞാൻ നിങ്ങളോട് അപേക്ഷിക്കുന്നു, അതുവഴി ആർ.എസ്.എസിന്റെ നിരോധനം പിൻവലിക്കുകയും ആർ.എസ്.എസ് അംഗങ്ങളെ ജയിലുകളിൽ നിന്ന് മോചിപ്പിക്കുകയും ചെയ്യുകയും. പ്രധാനമന്ത്രിയുടെ നേതൃത്വത്തിൽ എല്ലാ മേഖലകളിലും നടക്കുന്ന പുരോഗതിയുടെ പദ്ധതികളിൽ ആർ.എസ്.എസിനും അതിന്റെ അംഗങ്ങൾക്കും സംഭാവന നൽകാൻ കഴിയുന്ന കാലത്തിനായി ഞങ്ങൾ ആകാംക്ഷയോടെ കാത്തിരിക്കുകയാണ്.” [xiii]
[ഹിന്ദിയിലുള്ള ഈ കത്തുകളെല്ലാം ഈ ലേഖനത്തിന്റെ അവസാനം ആർ.എസ്.എസിന്റെ ഒരു പ്രസിദ്ധീകരണത്തിൽ നിന്ന് പുന:പ്രസിദ്ധീകരിച്ചതാണ്.]
ആർ.എസ്.എസ് നിർദ്ദേശപ്രകാരം ഭാരതീയ ജനസംഘം (1951) സ്ഥാപിച്ച പ്രമുഖ ഹിന്ദുത്വ പ്രത്യയശാസ്ത്രജ്ഞനായ ബൽരാജ് മധോക്ക് പോലും ഇത് ആവർത്തിച്ചത് ശ്രദ്ധേയമാണ്: “സംഘത്തിന്റെ സർസംഘചാലക് ശ്രീ ബാലസാഹിബ് ദേ വറസ് പൂനെയിലെ യെർവാദ ജയിലിൽ മിസ തടവുകാരനായിരുന്നു… ജയിലിൽ അദ്ദേഹത്തിന്റെ ജീവിതം സുഖസൗകര്യങ്ങൾ നിറഞ്ഞതായിരുന്നു. അതുകൊണ്ട്, 1975 ഓഗസ്റ്റ് 22 നും 1975 നവംബർ 10നും ലും ഇന്ദിരാഗാന്ധിക്ക് അദ്ദേഹം രണ്ട് കത്തുകൾ എഴുതി, സംഘത്തോടുള്ള അവരുടെ മനോഭാവം മാറ്റാനും അതിന്മേലുള്ള നിരോധനം നീക്കാനും ആവശ്യപ്പെട്ടു. ശ്രീ വിനോബ ഭാവേക്കും അദ്ദേഹം ഒരു കത്ത് എഴുതി, സംഘത്തോടുള്ള എതിർപ്പ് ഇന്ദിരാഗാന്ധിയുടെ മനസ്സിൽ നിന്ന് നീക്കാൻ ശ്രമിക്കണമെന്ന് അഭ്യർത്ഥിച്ചു. ഈ കത്തുകൾ സർക്കാർ ചോർത്തി പല പത്രങ്ങളിലും പ്രസിദ്ധീകരിച്ചു. ഇത് സ്വാഭാവികമായും സംഘ വളണ്ടിയർമാരുടെ മനോവീര്യത്തെ പ്രതികൂലമായി ബാധിക്കുകയും സത്യാഗ്രഹ പ്രസ്ഥാനം ഏതാണ്ട് നിലയ്ക്കുകയും ചെയ്തു.” [മധോക്, ബൽരാജ്, സിന്ദഗി കാ സഫർ –3: ദീൻദയാൽ ഉപാധ്യായ് കി ഹത്യ സെ ഇന്ദിരാഗാന്ധി കി ഹത്യ തക് (ജീവിതത്തിൻ്റെ യാത്ര-3: ദീൻദയാൽ ഉപാധ്യായയുടെ കൊലപാതകം മുതൽ ഇന്ദിരാഗാന്ധിയുടെ കൊലപാതകം വരെ), ദിൻമാൻ പ്രകാശൻ, 2003, പേജ് 188-189.]
ഇതേ വഴിയിലുള്ള ചരിത്രത്തിൽ നിന്നുള്ള മറ്റൊരു കൗതുകകരമായ വിവരം മുൻ രാഷ്ട്രപതി പ്രണവ് മുഖർജിയുമായി ബന്ധപ്പെട്ടതാണ്. രാഷ്ട്രപതി ആയിരുന്ന സമയത്ത് പ്രണബ് മുഖർജിയെ ഒരു പ്രത്യേക പരിപാടിയിലേക്ക് ആർഎസ്എസ് ക്ഷണിച്ചു. ഇന്ത്യയെ ഒരു ഹിന്ദു രാഷ്ട്രമാക്കുക എന്ന ലക്ഷ്യത്തിനായി പ്രവർത്തിക്കാൻ പ്രതിജ്ഞാബദ്ധരായ പുതിയ കേഡർമാരുടെ ബിരുദദാന ചടങ്ങിൽ മുഖ്യാതിഥിയായിട്ടായിരുന്നു അത് . ഇപ്പോഴത്തെ ആർ.എസ്.എസ് മേധാവിയായ മോഹൻ ഭാഗവത് തന്നെയായിരുന്നു ആ സ്ഥാനത്ത് അപ്പോഴും. അടിയന്തരാവസ്ഥയിലെ അതിക്രമങ്ങൾക്ക് കോൺഗ്രസിന്റെ ഉന്നത നേതാക്കളിൽ ഒരാളായി കുറ്റപ്പെടുത്തപ്പെട്ട വ്യക്തിയായിരുന്നു പ്രണബ് മുഖർജി എന്നത് ഇവിടെ എടുത്തുപറയേണ്ടതാണ്.
ഈ വസ്തുതകൾ ഉണ്ടായിരുന്നിട്ടും, അടിയന്തരാവസ്ഥയിലെ പീഡനത്തിന് ആയിരക്കണക്കിന് ആർ.എസ്.എസ് കേഡർമാർക്ക് പ്രതിമാസം പെൻഷൻ ലഭിക്കുന്നു എന്നതാണ് മറ്റൊരു പരിഹാസ്യവും ലജ്ജാകരവുമായ വസ്തുത. ബി.ജെ.പി ഭരിക്കുന്ന സംസ്ഥാനങ്ങളായ ഗുജറാത്ത്, മധ്യപ്രദേശ്, രാജസ്ഥാൻ, മഹാരാഷ്ട്ര എന്നിവിടങ്ങളിൽ അടിയന്തരാവസ്ഥാ കാലത്ത് 2 മാസത്തിൽ താഴെ തടവിൽ കഴിഞ്ഞവർക്ക് 20,000 രൂപയും, ഒരു മാസത്തിൽ താഴെ തടവിൽ കഴിഞ്ഞവർക്ക് 10,000 രൂപയും പ്രതിമാസ പെൻഷൻ നൽകുന്നുണ്ട് . ഒന്നോ രണ്ടോ മാസത്തെ തടവ് ശിക്ഷ മാത്രം പൂർത്തിയാക്കി ദയാഹർജി സമർപ്പിച്ച ആർ.എസ്.എസ് കേഡർമാരുടെ സാമ്പത്തിക താൽപ്പര്യം പോലും ആർ.എസ്.എസ് പിന്തുണയുള്ള ബി.ജെ.പി സംസ്ഥാനങ്ങളുടെ ഈ നയപരമായ തീരുമാനങ്ങൾ പരിഗണിച്ചു. ഇത്രയും വലിയൊരു തുക പെൻഷൻ ലഭിക്കുന്നതിന്, ഗുണഭോക്താവ് അടിയന്തരാവസ്ഥയുടെ മുഴുവൻ കാലവും ജയിലിൽ കഴിയണം എന്ന നിബന്ധന പോലും ഇവിടെ ബാധകമാക്കിയില്ല!
കൗതുകകരമെന്നു പറയട്ടെ, ഇതിന് നേർ വിപരീതമായി, കൊളോണിയൽ വിരുദ്ധ (ബ്രിട്ടീഷ്) സ്വാതന്ത്ര്യസമരത്തിന്റെ കാര്യത്തിൽ, സ്വാതന്ത്ര്യസമര സേനാനി പെൻഷൻ അവകാശപ്പെട്ട ഒരു ആർ.എസ്.എസ് കേഡർ പോലും ഉണ്ടായിട്ടില്ല. അടിയന്തരാവസ്ഥക്കാലത്ത് വ്യാജ ഏറ്റുമുട്ടലുകളിൽ കൊല്ലപ്പെട്ട നക്സലുകളെന്ന് മുദ്രകുത്തപ്പെട്ട നൂറുകണക്കിന് കമ്മ്യൂണിസ്റ്റ് യുവജനങ്ങളെ ആരും ഓർക്കുന്നില്ല എന്നത് ശ്രദ്ധേയമാണ്. രസകരമെന്നു പറയട്ടെ, ആർ.എസ്.എസിന്റെ ഹിന്ദുത്വ സഹയാത്രികരായ ശിവസേനയും അടിയന്തരാവസ്ഥയെ പരസ്യമായി പിന്തുണച്ചിരുന്നു.
2014-ൽ മോദി അധികാരത്തിലെത്തിയതിനെ ഒരിക്കൽ സ്വാഗതം ചെയ്ത മുതിർന്ന പത്രപ്രവർത്തക തവ്ലീൻ സിംഗ്, അടിയന്തരാവസ്ഥ പ്രഖ്യാപനത്തിന്റെ 50-ാം വാർഷികത്തിൽ ഇന്ത്യൻ ജനാധിപത്യത്തെ വിലയിരുത്തുമ്പോൾ തന്റെ വാക്കുകൾ ഒട്ടും മറച്ചുവെച്ചില്ല:
“ജനാധിപത്യ അവകാശങ്ങളുടെ ക്രൂരമായ അടിച്ചമർത്തൽ വീണ്ടും സംഭവിക്കാം, അതിന്റെ മറുപടി ‘അതെ, സംഭവിക്കാം, പക്ഷേ കൂടുതൽ അപകടകരമായ, സൂക്ഷ്മമായ രീതിയിൽ‘ എന്നതാണ്. നരേന്ദ്ര മോദി പ്രധാനമന്ത്രിയായതിനുശേഷം ഒരു ‘അപ്രഖ്യാപിത അടിയന്തരാവസ്ഥ‘ നിലവിൽ വന്നിട്ടുണ്ടെന്ന വിലയിരുത്തൽ വ്യാപകമാണ്. അത്തരത്തിലുള്ള വിധിന്യായങ്ങൾ നടത്താൻ ഞാൻ മടിക്കുന്നു, പക്ഷേ സംഭവിച്ചത്, നമ്മൾ സ്വാഭാവികമായി കണ്ടിരുന്ന ചില സ്വാതന്ത്ര്യങ്ങൾ അപകടത്തിലായി എന്നതാണ്. ഇത് പ്രതിപക്ഷ നേതാക്കളെയും പത്രപ്രവർത്തകരെയും വിമതരെയും ജയിലിലടച്ചുകൊണ്ടല്ല ചെയ്തത്, മറിച്ച് സ്വാതന്ത്ര്യത്തിന്മേൽ നിയമപരമായി നിയന്ത്രണങ്ങൾ ഏർപ്പെടുത്താൻ നിയമങ്ങളിൽ ഭേദഗതി വരുത്തിക്കൊണ്ടാണ്.”
തവ് ലീൻ സിങ് ഇങ്ങനെ തുടരുന്നു . “ രാജ്യദ്രോഹം തടയാൻ ഉദ്ദേശിച്ചുള്ള നിയമം ആ വാക്കിന്റെ നിർവചനം വികസിപ്പിക്കുന്നതിനായി ഭേദഗതി ചെയ്തിരിക്കുന്നു. കള്ളപ്പണം തടയുന്നതിനുള്ള നിയമങ്ങളിലും മാറ്റങ്ങൾ വരുത്തിയിട്ടുണ്ട്. ഒരു വിമതൻ ‘രാജ്യവിരുദ്ധ പ്രവർത്തനങ്ങൾക്ക്‘ ജയിലിൽ കഴിയുന്നില്ലെങ്കിൽ പോലും, എൻഫോഴ്സ്മെന്റ് ഡയറക്ടറേറ്റ് കള്ളപ്പണം വെളുപ്പിക്കൽ കുറ്റം ചുമത്തുന്നതിലൂടെ അയാൾ മറന്നുപോയ ഏതെങ്കിലും സെല്ലിൽ അഴുകിപ്പോകാൻ സാധ്യതയുണ്ട്. ഈ കുറ്റങ്ങൾ ചുമത്തപ്പെട്ട പ്രതിപക്ഷ നേതാക്കൾ ധീരമായി തിരിച്ചടിച്ചുവെങ്കിൽ അത് അവർക്ക് പിന്നിൽ രാഷ്ട്രീയ പാർട്ടികളുണ്ടായിരുന്നതുകൊണ്ടാണ്; എന്നാൽ വിമതരും പത്രപ്രവർത്തകരും നിശ്ശബ്ദരാകാൻ പഠിച്ചു. ഇത് നല്ലതാണോ? ഇതാണോ ജനാധിപത്യം?”
അപ്പോൾ, ചുമരിലെ എഴുത്ത് വ്യക്തമാണ്. ഇന്ത്യൻ ഭരണഘടനയിലെ ചില അനുച്ഛേദങ്ങൾ ഉപയോഗിച്ച് ഇന്ത്യയിൽ അടിയന്തരാവസ്ഥ പ്രഖ്യാപിക്കുകയും പിന്നീട് അത് റദ്ദാക്കുകയും ചെയ്തു. ഇന്ദിരാഗാന്ധിയും കോൺഗ്രസ് സർക്കാരും ഇല്ലാതെ, മോദി ഭരണത്തിൻ കീഴിൽ നമുക്ക് ഒരു ശാശ്വതമായ ‘അപ്രഖ്യാപിത‘ അടിയന്തരാവസ്ഥയുണ്ട്. അത് ഒരിക്കലും പ്രഖ്യാപിക്കാത്തതുകൊണ്ട് പിൻവലിക്കേണ്ട ആവശ്യവുമില്ല!
References
[i] ‘National Emergency 1975: The murder of the Indian republic on June 25, https://organiser.org/2025/06/24/298840/bharat/national-emergency-1975-the-murder-of-the-indian-republic-on-june-25/
[ii] Golwalkar, MS, Shri Guruji Samagar Darshan (collected works of Golwalkar in Hindi), Bhartiya Vichar Sadhna, Nagpur, nd., vol. I, p. 11.
[iii] Ibid. vol. III, p. 128.
[iv] http://archive.tehelka.com/story_main13.asp?filename=op070205And_Not_Even.asp
[v] https://www.indiatoday.in/india/story/rss-backed-indira-gandhis-emergency-ex-ib-chief-264127-2015-09-21
[vi] Ibid.
[vii] https://indianexpress.com/article/india/india-others/ib-ex-chiefs-book-rss-chief-deoras-had-backed-some-emergency-moves/
[viii] https://timesofindia.indiatimes.com/india/RSS-backed-Emergency-reveals-former-IB chief/articleshow/49052143.cms
[ix] https://medium.com/@hindu.nationalist1/double-game-of-senior-rss-leaders-during-emergency-74abc07a4fa8
[x] Madhukar Dattatraya Deoras, Hindu Sangathan aur Sattavaadi Rajneeti, Jagriti Prkashan, Noida, 1997, 270.
[xi] Ibid., 272-73
[xii] Ibid. 275-77
[xiii] Ibid. 278.
ഈ ലേഖനം ആദ്യം പ്രസിദ്ധീകരിച്ചത് SabrangIndia-ലാണ്. വായിക്കാം ഇവിടെ.
