‘കേരളം’ ആകാം; പക്ഷേ ‘കേരള സര്‍ക്കാര്‍’ മാറേണ്ടതുണ്ടോ? മുഖ്യമന്ത്രി വി ഡി സതീശന് ഒരു തുറന്ന കത്ത്
ബഹുമാനപ്പെട്ട ശ്രീ. വി.ഡി. സതീശന്,
സംസ്ഥാനത്തിന്റെ പേര് ‘കേരള’ എന്നതില്‍നിന്ന് ‘കേരളം’ എന്നാക്കി മാറ്റിയതുമായി ബന്ധപ്പെട്ട് കേന്ദ്ര-സംസ്ഥാന സര്‍ക്കാരുകളുടെ ഭാഗത്തുനിന്നുണ്ടായ ഒരു ഭാഷാപരമായ പിഴവിലേക്ക് അങ്ങയുടെ ശ്രദ്ധ ക്ഷണിക്കാനാണ് ഈ കത്തെഴുതുന്നത്. ഒഴിവാക്കാമായിരുന്ന ഒരു പിഴവാണിതെന്നാണ് എന്റെ അഭിപ്രായം.
സംസ്ഥാനത്തെ ‘കേരളം’ എന്നു വിളിക്കുന്നതില്‍ എനിക്ക് യാതൊരു എതിര്‍പ്പുമില്ല. വാസ്തവത്തില്‍, മലയാളത്തില്‍ നമ്മുടെ നാടിന്റെ ശരിയായ പേര് ‘കേരളം’ എന്നുതന്നെയാണ്. എന്നാല്‍, ‘കേരള’ എന്ന് ഉപയോഗിക്കേണ്ടിടങ്ങളിലെല്ലാം യാതൊരു വിവേചനവുമില്ലാതെ ‘കേരളം’ എന്ന് പ്രയോഗിക്കുന്നതിനോടാണ് എന്റെ വിയോജിപ്പ്.
മാറ്റത്തിനുവേണ്ടി മാത്രം മാറ്റങ്ങള്‍ വരുത്തുന്നത് ഒരിക്കലും പുരോഗതിയാകില്ല. ചിലപ്പോള്‍ അത് ആശയക്കുഴപ്പങ്ങള്‍ സൃഷ്ടിക്കുക മാത്രമല്ല, നമ്മുടെ ഭാഷാപരമായ അറിവില്ലായ്മ വെളിപ്പെടുത്തുകയും ചെയ്യും.
ഇക്കാര്യം വ്യക്തമാക്കാം.
‘കേരളം’ എന്നത് ഒരു നാമപദമാണ് (Noun). ‘1956-ലാണ് കേരളം രൂപീകൃതമായത്’ എന്നു പറയുന്നത് തികച്ചും ശരിയാണ്. അതുപോലെ ‘യൂണിവേഴ്സിറ്റി ഓഫ് കേരളം’ എന്നു പറയുന്നതിലും ഭാഷാപരമായി തെറ്റില്ല. എന്നാല്‍, അതേ വാക്ക് മറ്റൊരു നാമത്തെ വിശേഷിപ്പിക്കുന്ന രൂപത്തില്‍ വരുമ്പോള്‍ മാറ്റമുണ്ടാകുന്നു. നാം ‘കേരള യൂണിവേഴ്സിറ്റി’, ‘കേരള ഹൗസ്’, ‘കേരള സര്‍ക്കാര്‍’ എന്നൊക്കെയാണ് പറയാറുള്ളത്. അല്ലാതെ ‘കേരളം യൂണിവേഴ്സിറ്റി’, ‘കേരളം ഹൗസ്’, ‘കേരളം സര്‍ക്കാര്‍’ എന്നൊന്നും പറയാറില്ല.
ഈ വ്യത്യാസം കേരളത്തിനു മാത്രം ബാധകമായ ഒന്നല്ല. തലമുറകളായി നാം പിന്തുടരുന്ന മലയാളഭാഷയുടെ സ്വാഭാവികമായ പ്രയോഗരീതികളിലൊന്നാണിത്.
‘ഓണം’ എന്ന വാക്കുതന്നെ ഉദാഹരണമായി എടുക്കാം. നാം ഓണം ആഘോഷിക്കുന്നു. എന്നാല്‍, പരമ്പരാഗതമായ സദ്യയെ ‘ഓണസദ്യ’ എന്നും വസ്ത്രത്തെ ‘ഓണപ്പുടവ’ എന്നും വിളിക്കുന്നു. അല്ലാതെ ‘ഓണം സദ്യ’ എന്നോ ‘ഓണം പുടവ’ എന്നോ പറയാറില്ല. ഇത്തരം സന്ദര്‍ഭങ്ങളില്‍ ഒരു വാക്ക് മറ്റൊരു നാമത്തോടു ചേര്‍ന്ന് പ്രയോഗിക്കുമ്പോള്‍ അതിന്റെ അവസാനത്തെ ‘ം’ ഒഴിവാകുന്നു.
‘മലയാളം’ എന്ന വാക്കിന്റെ കാര്യത്തിലും സമാനമായ പ്രയോഗരീതിയുണ്ട്. നാം സംസാരിക്കുന്നത് മലയാളമാണ്. എന്നാല്‍, ആ ഭാഷയെ ‘മലയാളം ഭാഷ’ എന്നല്ല, ‘മലയാള ഭാഷ’ എന്നാണ് വിശേഷിപ്പിക്കുന്നത്. ‘മലയാള മനോരമ’ എന്ന പേരില്‍ ഒരു പത്രമുണ്ട്; ‘മലയാളം മനോരമ’ എന്നല്ല അതിന്റെ പേര്. ഇംഗ്ലീഷില്‍ നമ്മുടെ ഭാഷ ‘മലയാളം’ എന്ന പേരില്‍ അറിയപ്പെടുന്നു എന്ന കാരണത്താല്‍ മാത്രം ആ പത്രത്തിന്റെ പേര് ‘മലയാളം മനോരമ’ എന്നു മാറ്റണമെന്ന് ഇതുവരെ ആരും ആവശ്യപ്പെട്ടിട്ടില്ല.
പിന്നെ എന്തുകൊണ്ടാണ് ഈ ഭാഷാപരമായ പ്രയോഗരീതി ‘കേരളം’ എന്ന വാക്കിന്റെ കാര്യത്തില്‍ ബാധകമാകാത്തത്?
ഈ വ്യത്യാസം വ്യക്തിപരമായി എനിക്ക് പ്രധാനപ്പെട്ടതാകാന്‍ മറ്റൊരു കാരണം കൂടിയുണ്ട്. 1939-ല്‍ വി.പി. മേനോന്‍ സ്ഥാപിച്ച ന്യൂഡല്‍ഹിയിലെ ‘കേരള ക്ലബ്ബിന്റെ’ (Kerala Club) പ്രസിഡന്റാണ് ഞാന്‍. ഇതിന്റെ പേര് ‘കേരളം ക്ലബ്’ എന്നു മാറ്റണമെന്ന് ആര്‍ക്കെങ്കിലും ഗൗരവമായി നിര്‍ദേശിക്കാന്‍ കഴിയുമോ? അത് ഭാഷാപരമായി തെറ്റായിരിക്കും. മാത്രമല്ല, ഈ സ്ഥാപനവുമായി തലമുറകളായി ബന്ധപ്പെട്ടുനില്‍ക്കുന്നവര്‍ക്ക് അത്തരമൊരു പേര് അസ്വാഭാവികമായും അനുഭവപ്പെടും.
‘കേരള’എന്നത് വിശേഷണാത്മകമായി ഉപയോഗിക്കുന്നതിനാല്‍ ‘കേരള ക്ലബ്’ എന്ന പേര് തികച്ചും അനുയോജ്യമാണ്.
നമ്മുടെ സംസ്ഥാനത്തിന്റെ ഔദ്യോഗിക പേര് ‘കേരളം’ എന്നാക്കുന്നതില്‍ എനിക്ക് യാതൊരു എതിര്‍പ്പുമില്ല. അത് നമ്മുടെ നാടിന്റെ മലയാളത്തിലുള്ള പേരാണ്. അതില്‍ അഭിമാനിക്കുന്നതില്‍ തെറ്റൊന്നുമില്ല. എന്നാല്‍, നാമപദത്തെയും അതിന്റെ വിശേഷണാത്മക രൂപത്തെയും ഒരുപോലെ കാണാന്‍ കഴിയില്ല. ‘കേരള സര്‍ക്കാര്‍’, ‘കേരള സ്പോര്‍ട്സ്’, ‘കേരള ഭക്ഷണം’, ‘കേരള സംസ്കാരം’, ‘കേരള യൂണിവേഴ്സിറ്റി’ എന്നിങ്ങനെയുള്ള പ്രയോഗങ്ങള്‍ നാം തുടര്‍ന്നും ഉപയോഗിക്കണം.
സംസ്ഥാനത്തെ സ്വതന്ത്രമായ ഒരു നാമപദമായി പരാമര്‍ശിക്കുമ്പോഴാണ് ‘കേരളം’ എന്ന രൂപം ഉപയോഗിക്കേണ്ടത്. ‘കേരള’ എന്നത് ‘കേരളം’ എന്ന വാക്കിന്റെ ഇംഗ്ലീഷ് രൂപം മാത്രമാണെന്ന് പലരും കരുതുന്നതുകൊണ്ടാകാം ഈ ആശയക്കുഴപ്പം ഉണ്ടായതെന്ന് ഞാന്‍ സംശയിക്കുന്നു.
എന്നാല്‍, ഭാഷയുടെ പ്രവര്‍ത്തനരീതി അങ്ങനെയല്ല. ‘കേരളം’ എന്ന വാക്കിന്റെ വിദേശീയമോ നിലവാരം കുറഞ്ഞതോ ആയ രൂപമല്ല ‘കേരള’. മലയാളത്തില്‍ത്തന്നെ കാലങ്ങളായി ഉപയോഗിച്ചുവരുന്ന, മറ്റൊരു നാമത്തെ വിശേഷിപ്പിക്കാന്‍ അനുയോജ്യമായ രൂപമാണത്.
സംസ്ഥാനത്തിന്റെ ഭാഷാപരമായ സ്വത്വം വീണ്ടെടുക്കാനുള്ള ആഗ്രഹമായിരിക്കാം ഈ പേരുമാറ്റത്തിനു പിന്നില്‍. അതൊരു നല്ല കാര്യംതന്നെയാണ്. എന്നാല്‍, ഭാഷാസ്നേഹത്തോടൊപ്പം ഭാഷയെക്കുറിച്ചുള്ള അറിവും ഉണ്ടാകണം. മലയാളത്തിന്റെ വ്യാകരണവും സ്വാഭാവികമായ പ്രയോഗരീതികളും അവഗണിച്ചുകൊണ്ട് നമുക്ക് ആ ഭാഷയെ ബഹുമാനിക്കാന്‍ കഴിയില്ല.
അതിനാല്‍, ഈ വിഷയം കേന്ദ്ര സര്‍ക്കാരുമായും ബന്ധപ്പെട്ട ഭാഷാ അധികാരികളുമായും ചര്‍ച്ച ചെയ്യണമെന്ന് ഞാന്‍ അഭ്യര്‍ഥിക്കുന്നു.
സംസ്ഥാനത്തിന്റെ ഔദ്യോഗിക പേര് ‘കേരളം’ എന്നാക്കുന്നതുകൊണ്ട് ആ സംസ്ഥാനവുമായി ബന്ധപ്പെട്ട എല്ലാ സ്ഥാപനങ്ങളുടെയും സംഘടനകളുടെയും വകുപ്പുകളുടെയും പേരുകളില്‍ ‘കേരള’ എന്നതിനു പകരം ‘കേരളം’ എന്നു ചേര്‍ക്കണമെന്നില്ല. അത്തരത്തിലുള്ള വിവേചനരഹിതമായ പ്രയോഗം മലയാളത്തെ വളര്‍ത്തുകയല്ല, മറിച്ച് വികലമാക്കുകയാണ് ചെയ്യുന്നത്.
ശരിയായി നിലനില്‍ക്കുന്ന ഒരു പ്രയോഗം അനാവശ്യമായി മാറ്റുന്നതുകൊണ്ട് യാതൊരു ഗുണവുമില്ല. ഒരു ചെറിയ പേരുമാറ്റത്തെ സാംസ്കാരിക നവോത്ഥാനമായി തെറ്റിദ്ധരിക്കുകയും അരുത്.
നമ്മുടെ നാട് ‘കേരളം’ എന്നുതന്നെ അറിയപ്പെടട്ടെ. അതേസമയം, ‘കേരള സര്‍ക്കാര്‍’ എന്നത് ‘കേരള സര്‍ക്കാര്‍’ ആയിത്തന്നെ തുടരട്ടെ!
