സൗന്ദര്യമുള്ള സമരങ്ങൾ

ലോകമെമ്പാടും സമരങ്ങൾ അലയടിക്കുന്ന കാലമാണിത്.ഈ സമരങ്ങൾക്കെല്ലാം ഒരു പൊതുസ്വഭാവം നമുക്ക് കാണാനാകും.ജന ജീവിതത്തെ ദുസ്സഹമാക്കുന്ന തീവ്ര വലതുപക്ഷത്തിന്റെ നയങ്ങൾ അതിന്റെ എല്ലാ സീമകളും ലംഘിച്ചപ്പോഴാണ് ജനങ്ങൾ തെരുവുകളെ സമരങ്ങൾ കൊണ്ട് സമ്പന്നമാക്കിയത്.സാധാരണക്കാരായ മനുഷ്യരുടെ മാന്യമായി ജീവിക്കാനുള്ള അവകാശങ്ങളേയും അവസരങ്ങളേയും നിഷ്ക്കരുണം ഇല്ലാതാക്കിയ വലതുപക്ഷ രാഷ്ട്രീയത്തെ ഇനിയും എതിർക്കാതിരുന്നാൽ അടുത്ത തലമുറ കൂടി വംശഹത്യകൾക്കും ദാരിദ്ര്യവൽക്കരണത്തിലേക്കും എടുത്തെറിയപ്പെടുമെന്നും സ്വന്തം രാജ്യങ്ങളിൽ തന്നെ അവർ അന്യവൽക്കരിക്കപ്പെടുമെന്നും മനസ്സിലായപ്പോഴാണ് ഇന്ത്യയിലും ഫ്രാൻസിലും സെർബിയയിലും പോളണ്ടിലും ഇറ്റലിയിലും ജർമ്മനിയിലും സമരങ്ങൾ കൊടുമ്പിരി കൊണ്ടത്.വോട്ടു മോഷണത്തിനെതിരെ ഡൽഹിയിലെ രാംലീല മൈതാനത്ത് ഒത്തു കൂടിയ ലക്ഷങ്ങൾ അവിടെ മറ്റു വിഷയങ്ങളും ചർച്ച ചെയ്തു.വർദ്ധിച്ചു വരുന്ന തൊഴിലില്ലായ്മ,സ്ത്രീകൾക്ക് നേരെയുള്ള ആക്രമണങ്ങൾ,മണിപ്പൂരിലെ സംഘട്ടനങ്ങൾ,സംവരണങ്ങളെ അട്ടിമറിക്കാനുള്ള നീക്കങ്ങൾ തുടങ്ങിയ വിഷയങ്ങൾ വിവിധ സംസ്ഥാനങ്ങളിൽ നിന്നും വന്നവർ പരസ്പരം പങ്കു വച്ചു.പ്രതിപക്ഷത്തുള്ള രാഷ്ട്രീയ കക്ഷികൾ ജനാധിപത്യത്തിന്റെ ഏറ്റവും ഉന്നതമായ മൂല്യങ്ങൾ ഉൾക്കൊണ്ടു കൊണ്ട് ഒരേ വേദിയിൽ ഇരുന്നത് ഈ അടുത്ത കാലത്ത് ലോകം കണ്ട ഏറ്റവും മനോഹരമായ കാഴ്ചകളിലൊന്നായിരുന്നു.സംസ്ഥാനങ്ങളിൽ ഭരണ-പ്രതിപക്ഷങ്ങളായിരിക്കുന്നവർ പോലും ഇന്ത്യയിലെ സാധാരണക്കാരന് വേണ്ടി ഒരുമിച്ച് അണി നിരന്നത് ലോക രാഷ്ട്രീയത്തിന് തന്നെ വലിയൊരു സന്ദേശമാണ് നൽകിയത്.

ഇൻഡ്യാ സഖ്യത്തിന്റെ റാലിയിൽ പങ്കെടുക്കാനെത്തിയ ജനതതിയുടെ വൈവിധ്യം അത്ഭുതാവഹമായിരുന്നു.ഇന്ത്യയിലെ എല്ലാ സംസ്ഥാനങ്ങളിൽ നിന്നുമുള്ള വിവിധ പ്രായത്തിലുള്ളവർ ഡൽഹിയിലെത്തി.ജാതി-മത-വർഗ്ഗ വ്യത്യാസമില്ലാതെയായിരുന്നു അവർ തോളോട് തോൾ ചേർന്നത്.കർഷകർ,കർഷകത്തൊഴിലാളികൾ,വീട്ടുജോലിക്കാർ,വിദ്യാർത്ഥികൾ,ചെറുകിടകച്ചവടക്കാർ,അദ്ധ്യാപകർ,വക്കീലന്മാർ,ട്രാൻസ്ജെൻഡർ ആക്ടിവിസ്റ്റുകൾ,മണിപ്പൂരിലെ സംഘർഷങ്ങളിൽ പെട്ട് ഉറ്റവരേയും ഉടയവരേയും നഷ്ടപ്പെട്ടവർ,ഗോത്ര വിഭാഗക്കാർ,മൽസ്യത്തൊഴിലാളികൾ എന്നിവരോട് ഈ ലേഖകന് സംസാരിക്കാൻ സാധിച്ചു.മിക്കവാറും എല്ലാവരും സ്വന്തം കാശ് ഉപയോഗിച്ച് പല മാർഗ്ഗങ്ങളിലൂടെ ഡൽഹിയിലെത്തിയവരാണ്.രാംലീല മൈതാനത്തെ റാലിയിൽ പങ്കെടുത്താൽ തിരിച്ചു വരുമ്പോൾ കാണിച്ച് തരാമെന്ന സംഘപരിവാരത്തിന്റെ ഭീഷണിയെ അവർ തൃണവൽഗണിക്കുകയാണ് ചെയ്തത്.സാമൂഹികമായി ഒറ്റപ്പെടുത്തുമെന്ന ഭീഷണി ഉത്തർപ്രദേശിലും ബീഹാറിലും സംഘപരിവാർ പരസ്യമായി തന്നെ പറഞ്ഞിരുന്നു.കേവലം ഗുണ്ടാഗർജ്ജനമായി മാത്രമേ ജനങ്ങൾ അത്തരം ഭീഷണികളെ കണ്ടുള്ളൂ.പ്രത്യേകിച്ചും സ്ത്രീകൾ.ഞാൻ സംസാരിച്ച സ്ത്രീകൾക്ക് റോൾ മോഡലായിരിക്കുന്നത് നേഹാ ബോറയാണ്.ഈ സമരം ഇന്ത്യയ്ക്ക് നൽകിയ പുതിയ നേതാവും നേഹ തന്നെയാണ്.

വളരെ ബാലിശമായിട്ടാണ് ബി.ജെ.പി ഈ സമരത്തെ വിമർശിക്കുന്നത്.അടുത്ത മുപ്പത് വർഷത്തേക്ക് കോൺഗ്രസ്സ് അധികാരത്തിൽ വരില്ലെന്ന അമിത് ഷായുടെ പ്രഖ്യാപനം,മോഡി കഴിഞ്ഞാൽ താൻ തന്നെയാണെന്ന് യോഗി ആദിത്യനാഥ് ഉൾപ്പടെയുള്ള ബി.ജെ.പിയിലെ അധികാര മോഹികൾക്ക് നൽകുന്ന സന്ദേശം കൂടിയാണ്.രാംലീല മൈതാനിയിൽ കസേരകൾ ഒഴിഞ്ഞു കിടന്നു,കൊണാട്ട് പ്ളേസിലെ കച്ചവടക്കാരുടെ കച്ചവടം മുടങ്ങി,രാഹുൽ ഗാന്ധിയ്ക്ക് പ്രധാനമന്ത്രിയാകാൻ കഴിയാത്തതിലെ കൊതിക്കെറുവാണ് തുടങ്ങിയ സ്ഥിരം പല്ലവികളും നഡ്ഢയുൾപ്പടെയുള്ള നേതാക്കൾ പറയുന്നുണ്ട്.എൻ.ഡി.എയെ മുന്നണിയിലെ സഖ്യകക്ഷികളായ നിതീഷ് കുമാറിന്റെ ജനതാദളും ചന്ദ്രബാബു നായിഡുവിന്റെ തെലുങ്കുദേശവും വായ തുറന്നിട്ടില്ലെന്നത് കാണാതെ പോകരുത്.വലിയ അകലത്തിലല്ലാതെ പാലം വലിക്കാൻ ഇവർ ഒരുങ്ങുകയാണെന്ന അന്തപ്പുര വാർത്തകളും പ്രചരിക്കുന്നുണ്ട്.ബീഹാറിലെ ജാതി രാഷ്ട്രീയത്തിന്റെ അടിയൊഴുക്കുകൾ ബി.ജെ.പിയെക്കാൾ നന്നായി അറിയുന്നയാളാണ് നിതീഷ് കുമാർ.ആന്ധ്രപ്രദേശിലെ തൊഴിൽരഹിതരായ യുവതീയുവാക്കൾ പൊട്ടിത്തെറിക്കാൻ നിൽക്കുന്നത് ചന്ദ്രബാബു നായിഡുവും മനസ്സിലാക്കിയിട്ടുണ്ട്.ശരിയായ രീതിയിൽ തെരഞ്ഞെടുപ്പ് നടന്നാൽ തങ്ങൾ മിക്കവാറും സംസ്ഥാനങ്ങളിലും കേന്ദ്രത്തിലും അധികാരത്തിൽ നിന്നും പുറത്ത് പോകുമെന്ന ഭീതി സംഘപരിവാരത്തിനുണ്ട്.പക്ഷേ പിറവി കൊണ്ട് തന്നെ ജനാധിപത്യ നിഷേധികളായ ആർ.എസ്.എസ് നയിക്കുന്ന സംഘപരിവാരത്തിന് ഇന്ത്യൻ ഭരണഘടനയേയും ജനാധിപത്യത്തെയും കുറിച്ച് ഇപ്പോഴും ധാരണയില്ല.ലോകമെങ്ങും അരങ്ങേറുന്ന വലതുപക്ഷ വിരുദ്ധ സമരങ്ങളുടെ അനുരണനങ്ങൾ ഇന്ത്യയിലും ഉണ്ടാവുക തന്നെ ചെയ്യും.ഇന്റർ നെറ്റ് നിരോധിച്ചാൽ ഇത് അറിയാതെ പോവില്ല.ലോകമെങ്ങുമുളള തലച്ചോറ് നരച്ച വലതുപക്ഷ നേതൃത്വങ്ങളെ വെല്ലുവിളിക്കുന്നത് സമരതീക്ഷ്ണമായ യൗവനമാണ്.അവർക്ക് സിംഹാസനങ്ങളോടല്ല താല്പര്യം.അവരുടെ അവകാശങ്ങളും അവസരങ്ങളും സംരക്ഷിക്കാൻ അവർ ഏതറ്റം വരെയും പോകും.അതാണ് ചരിത്രവും.

വിഡ്ഢിത്തരങ്ങൾ പറയുന്നതിൽ ഏറ്റവും മുന്നിൽ നിൽക്കുന്ന ഇന്ത്യയിലെ രാഷ്ട്രീയ നേതാക്കളിൽ ഒരാളാണ് നിർഭാഗ്യവശാൽ ഈ മഹത്തായ രാജ്യത്തിന്റെ ആഭ്യന്തരവകുപ്പ് കൈകാര്യം ചെയ്യുന്ന അമിത് ഷാ.നവംബർ രണ്ടാം തീയതി ഡൽഹിയിൽ ഒരു സമ്മേളനം നടന്നു.ശതാബ്ദി സമാരോഹ് 2026 എന്നായിരുന്നു സമ്മേളനത്തിന്റെ പേര്.അഖിൽ വിശ്വ ഗായത്രി പരിവാർ എന്നൊരു സംഘപരിവാർ സംഘടനയാണ് സമ്മേളനം സംഘടിപ്പിച്ചത്.എന്നും ഗായത്രി മന്ത്രം ചൊല്ലിയാൽ യുവാക്കളുടെ ധൈര്യം,ഓർമ്മശക്തി,തീരുമാനങ്ങൾ എടുക്കാനുള്ള കഴിവ്,ആഖ്യാന പാടവം മുതലായവ കൂടുമെന്നാണ് അമിത് ഷാ പ്രസംഗിച്ചത്.അത് തന്റെ അനുഭവമാണെന്ന് കൂട്ടിച്ചേർക്കാനും അദ്ദേഹം മറന്നില്ല.ശാസ്ത്രത്തിന്റെ അടിസ്ഥാനത്തിൽ വരും തലമുറയെ പടുത്തുയർത്തണമെന്ന് നിഷ്കർഷിക്കുന്നത് നമ്മുടെ ഭരണഘടനയാണ്.ആ ഭരണഘടനയെ തൊട്ട് സത്യം ചെയ്ത് മന്ത്രിയായ ആളാണ് ഇത്തരത്തിൽ അഭിപ്രായങ്ങൾ പറയുന്നത്.ഭരണഘടനയ്ക്ക് മുകളിൽ മതബോധത്തേയും ബ്രാഹ്മണിസത്തേയും പ്രതിഷ്ഠിക്കുന്നത് നിരക്ഷരരും പുതുനിരക്ഷരരുമായ ആളുകളുടെ മതവികാരത്തെ ഉണർത്തി വോട്ടുറപ്പിക്കാനുള്ള തന്ത്രമാണെന്ന് ഇക്കാലത്ത് എല്ലാവർക്കും അറിയാം.ഇതേ അമിത്ഷാ നവംബർ അഞ്ചാം തീയതി ഹരിയാനയിലെ കർണാലിൽ ഒരു പദയാത്ര നടത്തുന്നുണ്ട്.ബി.ജെ.പിയുടെ രാഷ്ട്രീയ അജണ്ടയുടെ പ്രചാരണത്തിനായി എത്തുന്ന അമിത്ഷായെ സ്വീകരിക്കാൻ വേണ്ടി അമ്പത് കോടി രൂപയുടെ നവീകരണമാണ് ഇപ്പോൾ കർണാലിൽ നടക്കുന്നത്.സംസ്ഥാന മന്ത്രിമാർ മുതൽ സീനിയർ ഐ.എ.എസുകാർ വരെ കർണാലിൽ ക്യാമ്പ് ചെയ്താണ് പ്രവർത്തനങ്ങൾ ഏകോപിപ്പിക്കുന്നത്.സർക്കാർ ഖജനാവിലെ പണം ഉപയോഗിച്ച് ബി.ജെ.പിയുടെ രാഷ്ട്രീയ പ്രവർത്തനം.അ‍ഞ്ച് നിയമസഭാ മണ്ഡലങ്ങളാണ് കർണാലിൽ ഉള്ളത്.പതിന‍ഞ്ച് ലക്ഷം ആളുകൾ തെരുവിലാണ് താമസം.ആരെ കാണിക്കാനാണ് ഈ മോടി കൂട്ടലെന്ന് ആർക്കും അറിയില്ല.

കേരളത്തിലെ ഭരണം പൊടിപൊടിക്കുകയാണ്.കേരളത്തിന്റെ പുതിയ മുഖ്യമന്ത്രിയ്ക്ക് സ്ഥലജലവിഭ്രാന്തി പിടിപെട്ട മട്ടാണ്.പ്രതിപക്ഷ നേതാവായിരുന്നപ്പോൾ എന്തൊക്കെ പറഞ്ഞോ അതൊക്കെ കാറ്റിൽ പറത്തിയുള്ള ഭരണത്തിൽ ഇപ്പോൾ കയറി പിടിച്ചിരിക്കുന്നത് കിഫ്ബിയിലാണ്.കിഫ്ബിയെ ഒഴിവാക്കി യാതൊരു വികസന പ്രവർത്തനവും കേരളത്തിൽ നടക്കില്ലെന്ന് അരിയാഹാരം കഴിക്കുന്നവർക്ക് അറിയാം.ബഡ്ജറ്റിന്റെ 76 ശതമാനം ശമ്പളവും പെൻഷനും കൊടുക്കാനുപയോഗിക്കുന്ന സംസ്ഥാനമാണ് കേരളം.ബാക്കിയിൽ നിന്നുമാണ് ഭരണനിർവ്വഹണവും വികസന പ്രവർത്തനങ്ങളും നടത്താൻ.സുധാപിള്ളയെന്ന ഐ.എ.എസുകാരിയുടെ ടോയ്ലെറ്റ് പേപ്പറിന്റെ പോലും വിലയില്ലാത്ത റിപ്പോർട്ടിന്മേലാണ് സർക്കാർ കിഫ്ബിക്കെതിരെ തിരിഞ്ഞിരിക്കുന്നത്.ധനകാര്യവകുപ്പ് കൈകാര്യം ചെയ്യുന്ന മുഖ്യമന്ത്രിയ്ക്ക് തീരെ അറിയാത്ത ഒരു വിഷയം ഇക്കണോമിക്സാണ്.മസാലബോണ്ടിലൂടെ ധനസമാഹരണം നടത്തുന്ന കിഫ്ബി നൽകുന്ന പലിശ ഉയർന്നതാണ് പോലുള്ള തമാശകളും അദ്ദേഹം പറയുന്നുണ്ട്.മികച്ച ആദായം ഉറപ്പാക്കിയാൽ മാത്രമേ ഓഹരിവിപണിയിൽ നിക്ഷേപം വരികയുള്ളൂ.അതിനുള്ള എല്ലാ മാനദണ്ഡങ്ങളും കിഫ്ബി പാലിച്ചിട്ടുമുണ്ട്.അതിന്റെ എല്ലാം രേഖ പൊതുസമക്ഷത്തിൽ ലഭ്യവുമാണ്.റിസർവ്വ് ബാങ്കിന്റേയും സെബിയുടേയും കർശനമായ മേൽ നോട്ടത്തിലാണ് കിഫ്ബി കാര്യങ്ങൾ ചെയ്തിട്ടുള്ളതും ചെയ്യുന്നതും.ഒരു സാധാ സഹകരണബാങ്കു പോലും നേരെ ചൊവ്വേ നടത്തി പരിചയമില്ലാത്ത കോൺഗ്രസ്സുകാരോട് ഇതൊന്നും പറഞ്ഞിട്ടു കാര്യമില്ല.അവരുടെ സാമ്പത്തിക മാനേജ്മെന്റിന്റെ പ്രത്യക്ഷ ഉദാഹരണം കാണണമെങ്കിൽ നാഷണൽ ഹെറാൾഡ്,വീക്ഷണം പത്രം,ജയ്ഹിന്ദ് ടി.വി എന്നിവയുടെ അവസ്ഥ മാത്രം നോക്കിയാൽ മതി.ഇതാണ് സാമ്പത്തിക കാര്യങ്ങൾ കൈകാര്യം ചെയ്യുന്ന മുഖ്യമന്ത്രിയുടേയും അവസ്ഥ.കിഫ്ബി ഫണ്ടില്ലെങ്കിൽ ഒന്നും നടക്കില്ലെന്ന ബോധ്യം അനുഭവത്തിന്റെ അടിസ്ഥാനത്തിൽ ബോധ്യമുള്ള മലയോര മേഖലയിലെ പ്രധാന പാർട്ടിയായ കേരള കോൺഗ്രസ്-ജോസഫ് വിഭാഗക്കാർക്കും മലബാറിലെ പ്രധാന യു.ഡി.എഫ് കക്ഷിയായ മുസ്ളീംലീഗിനും അറിയാവുന്നത് കൊണ്ടാണ് അവർ ഇക്കാര്യത്തിൽ വായ തുറക്കാത്തത്.മാത്രമല്ല ഈയിടെ ഉദ്ഘാടനം ചെയ്ത പല പാലങ്ങളും കിഫ്ബി ഫണ്ട് ഉപയോഗിച്ച് ചെയ്തതാണ്.സാമൂഹിക ഉത്തരവാദിത്വത്തിന്റെ പേരിൽ കിഫ്ബി വഴി ചെയ്ത പദ്ധതികളിൽ നിന്നും വരുമാനവും ലാഭവും വേണമെന്നാണ് നെഹ്റൂവിയൻ സോഷ്യലിസമാണ് തന്നെ നയിക്കുന്നതെന്ന് ആണയിട്ടു പറയുന്ന മുഖ്യമന്ത്രിയുടെ വാദം.സാമൂഹിക ഉത്തരവാദിത്വമെന്നത് സർക്കാരിന്റെ മാത്രം ഉത്തരവാദിത്വം ആണെന്നിരിക്കെ ലാഭം എന്ന രണ്ടക്ഷരത്തെ കൂട്ടുപിടിച്ച് വർത്തമാനം പറയുന്നത് കോർപ്പറേറ്റ് അജണ്ടയെ സഹായിക്കാൻ വേണ്ടി മാത്രമാണ്.കേരളത്തിൽ കറണ്ടു കട്ട് നടപ്പാക്കുന്നത് കേരളത്തിലെ ജനങ്ങൾ പുതിയതായി അഞ്ചു കോടി എയർകണ്ടീഷണറുകൾ വാങ്ങിയത് കൊണ്ടാണെന്ന് പറയാനുള്ള ഒരു പേരാവൂർ അപാരത കെ.പി.സി.സി പ്രസിഡണ്ട് കൂടിയായ സണ്ണിവക്കീലിന് മാത്രമേ കാണൂ.വൈദ്യുതി വകുപ്പ് മന്ത്രിയായ അദ്ദേഹത്തിന് പവർ മാനേജ്മെന്റ് എന്നത് ചുക്കോ ചുണ്ണാമ്പോ എന്നറിയില്ല.വികസനം മുരടിച്ചു നിൽക്കുന്ന അദ്ദേഹത്തിന്റെ മണ്ഡലമായ പേരാവൂരിൽ ഒരു തവണയെങ്കിലും യാത്ര ചെയ്താൽ നമുക്കത് ബോധ്യമാകും.തൊട്ടടുത്ത മണ്ഡലമായ മട്ടന്നൂരിൽ മനുഷ്യർക്ക് അനുഭവവേദ്യമായ തരത്തിൽ വികസനപ്രവർത്തനങ്ങൾ നടന്നപ്പോൾ കഴിഞ്ഞ മൂന്ന് തവണകളായി പേരാവൂരിനെ പ്രതിനിധികരിക്കുന്ന സണ്ണി ജോസഫ് എന്താണ് ചെയ്തതെന്നോ?കിഫ്ബി ഫണ്ടിൽ നിന്നും കാശെടുത്ത് നിർമ്മിച്ച മലയോര റോഡിനെ തന്റെ മികവായി കാണിച്ചു നടന്നു.തീരെ ഭരണപാടവമില്ലാത്തയാളാണ് സണ്ണി ജോസഫെന്ന് കോൺഗ്രസ്സുകാർ തന്നെ പറയുന്നുണ്ട്.ഇത്തരം മന്ത്രിമാരെ പോറ്റാനുളള ബാധ്യതയും ജനങ്ങൾക്ക് തന്നെ.ഇവരുടെ പെർഫോമൻസ് ഓഡിറ്റ് നടത്താൻ ഇന്ത്യയ്ക്ക് പുറത്തു നിന്നുള്ള ഒരു ഏജൻസിയെ ഏൽപ്പിച്ചാൽ അവർ ഏജൻസി മതിയാക്കി പോകുമെന്ന് ഉറപ്പ്.