ആസ്ത സവ്യസാചി
സ്വതന്ത്ര മാധ്യമ പ്രവർത്തകയായ ആസ്ത സവ്യസാചി ദേശീയ-സാർവദേശീയ തലങ്ങളിൽ പ്രവർത്തിച്ചുവരുന്നു. അൽ ജസീറ, ടിആർടി വേൾഡ്, ദിവയർ, സ്ക്രോൾ, ഹിമാൽ സൗത്ത് ഏഷ്യൻ, ഔട്ട് ലുക്ക് എന്നിങ്ങനെ നിരവധി മാധ്യമ സ്ഥാപനങ്ങളിൽ റിപ്പോർട്ടുകളും ലേഖനങ്ങളും പ്രസിദ്ധീകരിച്ചിട്ടുണ്ട്. സാമൂഹിക രാഷ്ട്രീയ പ്രശ്നങ്ങൾ, മനുഷ്യാവകാശ വിഷയങ്ങൾ, എന്നിങ്ങനെയുള്ള മേഖലകളിൽ സവിശേഷ ശ്രദ്ധ ചെലുത്തുന്ന ആസ്ത ഇന്ത്യൻ അമേരിക്കൻ മുസ്ലിം കൗൺസിലിന്റെ മനുഷ്യാവകാശ- മതസ്വാതന്ത്ര്യം ഗ്രാന്റിനു അർഹയായിട്ടുണ്ട്. അന്വേഷണാത്മക പത്രപ്രവർത്തനത്തിനുള്ള 2024 ലെ ഹാരി ഇവാൻസ് ഗ്ലോബൽ ഫെലോഷിപ്പിന് ഷോർട്ട് ലിസ്റ്റ് ചെയ്യപ്പെട്ടിട്ടുണ്ട്. സമാന ഹൃദയരായ മാധ്യമപ്രവർത്തകർ ഒത്തുചേർന്ന് ഉണ്ടാക്കിയ പൊതു താൽപര്യ സംഘടനയാണ് "റിപ്പോർട്ടേഴ്സ് കലക്റ്റിവ്". അധികാര സ്ഥാനത്തുള്ളവരെ തുറന്നുകാട്ടുകയും ഉത്തരവാദിത്തങ്ങൾ പാലിക്കാൻ നിർബന്ധിതരാക്കുകയും ചെയ്യുന്ന വാർത്തകളും വിശകലനങ്ങളും ആണ് റിപ്പോർട്ടേഴ്സ് കലക്റ്റിവ് പുറത്തുകൊണ്ടുവരാറുള്ളത്. കഴിഞ്ഞ കുറച്ചുകാലമായി അധികാര സ്ഥാനത്തുള്ളവരെ തുറന്നുകാട്ടുന്ന ഒട്ടനവധി വെളിപ്പെടുത്തലുകളും റിപ്പോർട്ടുകളും പ്രസിദ്ധീകരിച്ചിട്ടുണ്ട് ഈ സംഘടന.
