നജീബ് കുറ്റിപ്പുറം
എഴുത്തുകാരൻ, സാമൂഹികപ്രവർത്തകൻ, ചലച്ചിത്ര പ്രവർത്തകൻ, മാധ്യമ സംരംഭകൻ എന്നീ നിലകളിൽ പ്രവർത്തിക്കുന്ന നജീബ് കുറ്റിപ്പുറം മലപ്പുറം ജില്ലയിലെ കുറ്റിപ്പുറം ആസ്ഥാനമായുള്ള ഇല ഫൗണ്ടേഷന്റെ (ILA Foundation) സ്ഥാപകനാണ്. ജീവകാരുണ്യപ്രവർത്തനം, സാന്ത്വനപരിചരണം, സാമൂഹികമായി ഒറ്റപ്പെട്ടവരുടെ പുനരധിവാസം എന്നിവയാണ് പ്രധാന പ്രവർത്തന മേഖലകൾ. രോഗികൾക്കും ജീവിത പ്രതിസന്ധികളിലൂടെ കടന്നുപോകുന്നവർക്കും പരിചരണവും മാനസികപിന്തുണയും നൽകുന്ന ഇല ഫൗണ്ടേഷൻ, മതത്തിന്റെയും ജാതിയുടെയും അതിർവരമ്പുകൾക്കപ്പുറം മനുഷ്യരെ ചേർത്തുനിർത്തുന്ന ഒരു ഇടമാണ്. മാധ്യമ, മൾട്ടിമീഡിയ മേഖലകളിലും പ്രവർത്തിച്ചിട്ടുള്ള നജീബ്, യാത്രകളിലൂടെ വിവിധ പ്രദേശങ്ങളിലെ മനുഷ്യരുടെ ജീവിതാവസ്ഥകൾ അടുത്തറിയുകയും സാമൂഹികപ്രവർത്തനങ്ങളിൽ ഏർപ്പെടുകയും ചെയ്തു വരുന്നു.
ഇല ഫൗണ്ടേഷന്റെ പ്രവർത്തനങ്ങൾ സാന്ത്വനപരിചരണത്തിൽ മാത്രം ഒതുങ്ങുന്നില്ല. ഡയാലിസിസ് സൗകര്യം, മരുന്ന് ബാങ്ക്, വീടുകളിലെത്തിയുള്ള രോഗീപരിചരണം എന്നിവയ്ക്കൊപ്പം കുട്ടികളുടെയും കൗമാരക്കാരുടെയും വ്യക്തിത്വവികസനത്തിനായുള്ള പരിശീലനപരിപാടികളും സംഘടിപ്പിക്കുന്നുണ്ട്. (ഫോൺ: +919447046003)
